Najan anggang jauh ti lemburna, Yaya Rukayadi (Kang Ya) tetep henteu leungiteun jati diri nu napak kana budaya Sunda. Pangna kitu, keur nembongkeun rasa nyaah kana budaya jeung nganteungkeun tatali batin ka lemah caina, ditengah-tengah kasibukanana, Kang Ya sok mentingkeun nyieun carita pondok kalawan dimuat lolobana di Majalah Mangle jeung sababaraha di koran Tribun Jabar. Jinekna, aya 31 judul dimuat di Majalah Mangle, 3 (tilu) judul di koran Tribun Jabar), jeung 2 (dua) judul karangan nu tacan dimuat. Jejercaritana rupa-rupa, ti mimiti carita duriat, carita pentingna kulawarga, katuangan Sunda, kaunggulan obat herbal Sunda, nasib TKW, nasib alam Sunda, kapamingpinan Sunda, jeung carita kahirupan lianna.